شامی کرماشانی

شاهمراد مشتاق


▪نمونه‌ی شعر کوردی:
(۱)
[کرانشینی]
مه‌ردم باینه دیار ئی به‌دبه‌ختیه
له من به‌دبه‌خت تر و‌ه‌ی شاره نیه
به‌نده یه‌ی نه‌فه‌ر کرانشینم
چۊ ئه‌زیز مردی دایم غه‌مینم
نه خارج مه‌زهه‌ب نه جوداس دینم
ئه‌ر دوعاد گیراس بکه نفرینم
به‌شکه‌م له‌ی دونیا دیتر نه‌مینم
راحه‌ت بووم وه ده‌س کرانشینی
توای بزانی، سه‌گ و حاڵم نه‌و
ئاسایش نه‌یرم نه رووژ و نه شه‌و
سوب تا ئیواره هامه ته‌ق و ده‌و
تا سه‌رمانگ بای، دو تیکه ئه‌سپه‌و
یا به‌م بفروشم با بنمه گره‌و
ئۊشم کراگه‌م به‌ڵکه‌م نه‌مینی
چه بکه‌م وه ده‌س کرانشینی؟
داد وه هه‌ر که‌س به‌م حه‌قم نیه‌سینی
...
ژنم جارو کیش خوه‌م قاپچی ده‌رم
وه فه‌سل زمسان وه‌فر پاکه‌و که‌رم
له عه‌یش و عه‌زا چۊی سه‌ماوه‌رم
ده‌نگ که‌م نانه‌جیب، ده‌نگ نیه‌که‌م خه‌رم
خوه‌یان چۊی ئاقا به‌نده نه‌وکه‌رم
مه‌نعیان نه‌که‌ی ده‌نه بان سه‌رم
ئۊشن گووشت گه‌ن ئه‌ڕامان سینی
چه بکه‌م وه‌ده‌س کرانشینی؟
داد وه هه‌ر که‌س به‌م حه‌قم نیه‌سینی
...
یه‌ی هه‌فته مینی مانگ بچوو وه‌سه‌ر
ژن ساحوماڵ ده‌س نه‌یده که‌مه‌ر
وه ‌ژست ته‌مام تێده پشت ده‌ر
له وه‌ر پای هه‌ڵسم چۊی ئاقا و نه‌وکه‌ر
وه ژنم ئۊشم ده‌مکه سه‌ماوه‌ر
خوه‌م ده‌وم ئه‌ڕای میوه و شیرینی
چه‌بکه م وه‌ده‌س کرانشینی؟
داد وه هه‌ر که‌س به‌م حه‌قم نیه‌سینی
...
یه‌ی کوری دیرن چۊی وه‌چکه شه‌یتان
سۆب له ‌خه‌و هه‌ڵسی تێده ناو ئه‌یوان
جیبی پڕ له ریخ، ده‌س وه تیرکه‌مان
خه‌ید ئه‌ڕای قوریو جام و ئستکان
سیوڵ جافرخان گریده نشان
که‌س جورئه‌ت نه‌یری سدای بایده‌بان
بویشی جوانه‌مه‌رگ سه‌رم شکنی
چه بکه‌م وه‌ده‌س کرانشینی؟
داد وه هه‌ر که‌س به‌م حه‌قم نیه‌سینی
...
دارائیم بیه‌سه، چوار دوێت و یه‌ی کور
دو په‌تووی نیم دڕ، یه‌ی جوفت لافه شڕ
یه‌ی جوفت موته‌کای وه ده‌م قه‌یچی پڕ
سه‌ر نه‌یده‌بانی چۊی پاره ئاجور
سه‌رد گه‌ن که‌فی، تێیده خۆره‌خۆر
چوار جام رووحی یه‌ی دانه سینی
چه بکه‌م وه‌ده‌س کرانشینی؟
داد وه هه‌ر که‌س به‌م حه‌قم نیه‌سینی
...
زانی چه‌ن نه‌فه‌ر هایمه یه‌ی حه‌سار؟
من ئۊشم په‌نجا تو بۊش په‌نجاو چوار!
دریژ و کووتاه کاردار و بیکار
سوب هه‌ڵسی دۊنی له گووشه‌ی حه‌سار
هڤده ئه‌فتاوه نریاسه قه‌تار
بایه‌د په‌ی نه‌وبه‌ت بلیت بسینی!
چه بکه‌م وه‌ده‌س کرانشینی؟
داد وه هه‌ر که‌س به‌م حه‌قم نیه‌سینی.


(۲)
پەریشان مۆ پەریشانم وڵم کە
دچار دەرد پنھانم وڵم که
وە دەردم ئاشنا کردی، نەکردی
ستەمگەر فکر دەرمانم وڵم کە
وڵم کە تا نەوێ کەس پەی وە دەردم
دۆ سێ رووژی کە مێمانم وڵم کە
نەکرد کەس داوەتم خوەم بیمە مێمان
وە کار خوەم پەشیمانم وڵم کە
نە سازی من لە فوولاد و نە لە سەنگ
ھەف ھەش دا تیکە سۆخانم وڵم کە
ھەمامە ئی سەراێ سەرد و گەرمە
بساو کیسە وە ناوشانم وڵم کە
تەنم زانم نەسیب مار و موورە
نە موورم نە سۆڵێمانم وڵم کە
لەوە ترسم بکیشد کار وە ھاوار
نەکێ کەس گووش وە ئەفقانم وڵم کە
وە کام کەس نەگەردد چەرخ تا سەر
نە دەرویشم نە سۆڵتانم وڵم کە
وە بادەێ جام تەڵخ زندەگانی
دەمی مەست و قەزەڵخانم وڵم کە
خراوم کرد خەرابات خیاڵد
وە دەس چی ئەقل و ئیمانم وڵم کە
گوزەشت فەسڵ بەھار و مووسم باخ
وە فکر لەرز زمسانم وڵم کە
وە سەھراێ خیاڵ چون قەیس سانی
تۆ کردی وێڵ وێڵانم وڵم کە
وە واوێلای دڵ ھەر شەو رەوانە
سرشک قەم وە دامانم وڵم کە
وە کام دشمەن بوەم ئای دووس شکایەت
کە دووس بی قاتڵ گیانم وڵم کە
وڵم کەی یا نیەکەی رەھمی وە ھاڵم
تەنم کردیدە زندانم وڵم کە
وڵم کە وڵکەرت نیم سوب لە مەھشەر
تۆ کردی خار دەورانم وڵم که
وە ئەرواھ شەرەف سەوگەند کە دائم
مەلوول مەرگ وژدانم وڵم کە
شەرەف کوشیاد و وژدان جوانەمەرگ بی
وە بێوژدانی ھێرانم وڵم کە
تو کردی بێ سەروسامان «شامی»
وە مەولا خوەم قەشەنگ زانم وڵم کە.




گردآوری و نگارش:
#زانا_کوردستانی